Epistola A. prioris Podii [Ganagobiæ] ad G. abbatem Cluniacensem, de charta præcedenti Willelmi comitis Forcalquerii.
Reverentissimo patri in Christo et domino G., divina dante gratia abbati Cluniacensi, A. prior Podii et ejusdem loci conventus, salutem et subjacentiam filialem. Paternitati vestræ declaramus, domine reverendissime, quod hoc donum, quod superius prænominatum est in pagina, maxima est utilitas ecclesiæ nostræ. Quapropter preces vobis effundimus non modicas, quatinus, si placet, nobis a domino papa litteras confirmationis impetretis super hoc donum. Et ut paginæ isti fidem adhibeatis, hanc sigilli nostri munimine Sistaricensis episcopi latoris litterarum præsentium præmunimus.